طالب فزعتكم

[متعب المحمدي]

السلام عليكم ورحمة الله وبركاته

اما بعد

عندي ناقه خلفه اول مشاءالله تبارك الله سمينه الحين الناقة ظامر ولا تاكل الا شي بسيط من العلف وشوفها تمد رقبتها مثل الي يشد طوله ناحية غروب الشمس بالنسبه لدمنها اشوفه صغير وحيان اشوف كانه فيه جزاء بارز(حسب كلام البيطري يقول هذا هيام) اذا جيت المسها مع زورها او رقبتها ترغي وتجفل رغاها مثل الي يغرغر وتطلع الي تاكله عطيتها مره ابرة الهبوب وعطيتها زيت سمسم مع زيت الخردل مع حلبه وفلفل وتحسنت بس الحين اشوفها راجع فيها بلاها على فكره لقيت فيه ورم من مقدمها من الجنب ورم متحجر

وش علاج الي قلته لكم


وشكرا ,,,,,

[سعود الهاجري]

مساك الله بالخير اخوي متعب هاذي الحاله قد عثت في خلفاتنا العام وهذا نوع مثل الحرارة في الجسم تلقاه ظامر ودايمن عند حوض الماء و استخدمنا ابرة الزنبور ونتايجها ممتازه تبين من الاسبوع الاول اما على الورم الي ظهر فيمكنه( داريه) فهاذي منتشرها بحلالنا وحلال العالم ذا الزمان بصورة غير طبيعية فدهن الورم بقريز السيارات اذا انفطر قدا شرها ان شا الله وهاذا الي اعرفه وعساني فدتك والله يبعد عن حلالك وحلال المسلمين كل شر
...... تقبل تحياتي ......

[نواف الحربي]

اذا جيت المسها مع زورها او رقبتها ترغي وتجفل رغاها مثل الي يغرغر وتطلع الي تاكله عطيتها مره ابرة الهبوب وعطيتها زيت سمسم مع زيت الخردل مع حلبه وفلفل وتحسنت بس الحين اشوفها راجع فيها بلاها على فكره لقيت فيه ورم من مقدمها من الجنب ورم متحجر




السلام عليكم

اضن والله اعلم ان فيها ورم مسكر مجرى الطعام

وقد يكون التهابات شديده بزور الناقة


خذ ميزان حراره وحطة بمدمنها دقيقتين واذا يوجد حراره اكيد تحتاج مضاد حيوي للالتهابات والورام

استخدم تترمايسن

وايضا استخدم ابره الهيام

والهيام طفيليات بالدم وايضا يسبب اورام وحراره مستمره


الله يشافي حلالك

[متعب المحمدي]

الله يعطيكم العافيه على دلوكم في موضوعي ولا يحرمكم الاجر انشاءالله


وننتظر مشاركة الاخوة الباقين في الموضوع

ودمتم

[حمد بن جطلي]

السلام عليكم ورحمة الله وبركاته
اخوي متعب اذا دمن الناقه على كلامك فيه جزء بارز مثل راس المسمار؟
فمرضها يسمى الجرح ؟ وعلاجه الكي على الكلا ثلاث رقم او مغزل
والله يبارك لك في حلالك وعساني فدتك
وتقبل مروري وشكرآ00000000000000000

[عبدالله الجدعان العنزي]

أخوي متعب ,لك مني الدعاء الصادق أن يبارك لك الله في حلالك ومالك , وأنا ما عندي درايه بهالمرض هذا . لكن اللي اقدر اقوله انه مايمنع تاخذ جلك الله والسامعين من دمن الناقه وتعرضه على الدكتور البطري ليعمل لها تحليل , وبالكاد تكون النتيجه واضحه وبيعطيك لها العلاج الصحيح .