شكر وامتنان وزود عليها طلب المشوره يالوجيه الغانمة

[خالد بن عبدالعزيز]

بسم الله الرحمن الرحيم
اعضاء منتديات مزاين السلام عليكم
في البداية احب اشكر القائمين على هالمنتدى الرائع اللي انا شخصيا استفدت منه كثيرا وانا لست مسجل به بفضل ابدعات وروعه ونخوة وطيبة الاشخاص اللي متواجدين بهالمنتدى
فبذلت الجهد الجهيد لكي اسجل معكم لكي اشكركم اولا ولكي استقي اكثر واكثر من خبراتكم وابداعاتكم واتمنى اني احاول اني اضفي شي لهالمنتدى مع اني ماراح اقدر ازيد دام هالقروم موجودين ..........



وودي انشدكم يالربع وطامع في خبراتكم انا عندي بكرة بها عضة بعير بجنب موخرها (الله يكرمكم) والنابين متلاقيه من داخل الجرح . والجرح له فترة من ثلاث شهور تقريبا في الفترة الاخيرة عجزت وانا اتطبب بالجرح واحاول انظفه من الصديد وكل ما غسلته بالماء والملح ظهر الصديد مرة اخرى واستخدمت ماء الاوكسجين من صيدلية بشريه ايضا ومازال الصديد ينزل مع العلم اني لي حول الاسبوعين او اكثر وانا اغسلها يوميا ..........
اتمنى من عنده اي شي يقدر يفيدني فيه يبلغني او نصيحة ينصحني بها ...........
ولكم جزيل الشكر ...........

[منصور العدواني]

اعطها ابره مضاد حيوي

ورش الجرح بالبخاخ الازرق طبعا بعد ما تنظفه

والله يشفيها

[راشد العرق]

الله يشفيها ويبارك فيها ياخالد


رح للعطار واطلب منه خوّا جوّا واساله كيف طريقة تجهيز الدواء وداوم عليه وباذن الله تشوف ما يسرك

[عيدالمنصورى]

يغسل الجرح بالفوار ثم يضخ به العصار اللذي يستخدم للضرع وتعطى الناقه مضاد حيوي وافضل البنسلين

[طلال الروقي]

ياخالد مثل ماقال اخونا راشد خوا جوا وزد عليها مره مطحونه وحطها على جرح الناقة

وماتشوف باس في حلالك ومالك

[بخيت البريدي]

الجرح التهب عليك بالمضاد الحيوي في وقته لمدة خمس ايام

[وافي مليح بن موطان]

الاخوان ماقصرو

والله يعينك على كثر الأراء
لان كلن منا يذكر تجربته

انا افضل البنسلين وتحشى الجروح عويدي ومرة
او تحشاها بورق الشري اذا هو عندك متوفر
النسلين لمدة خمسة ايام
وباذن الله ماعليها الا العافية

[خالد بن عبدالعزيز]

الله لا يهينكم يا الربع ويبارك في مساعيكم وارائكم
لكن حبيت ابين لكم اني اعطيتها البنسلين لمدة خمس ايام متواصل قبل فترة ولكن مازال الجرح
يطلع منه الصديد

وبالنسبة للاخوان اللي قالوا الخوا جوا هل قصدقكم اني اغسل به الجرح من الداخل او اني اضعه على الجرح من الخارج فقط ....
وبالنسبة لك يا اخ عـــــــــــــيد العصار اللي تتكلم عنه اضعه داخل الجرح او خارجه فقط وليتك تبين لي اسمه بالضبط .........
والله لايهين الجميع ويجزاكم خير ويريكم ما يسعدكم في حلالكم ومالكم

[محمدبن رشيد الحنتوشي]

الجرح تعفن لازم تنضف الجرح لانك بتلقى فيه لحم فاسد طلع اللحم الفاسد برى واعصر الجرح لين ينظف من الصديد وبعدها رش البنسلين عن طريق البرواز داخل الجرح وداوم على هالطريقه لين يلتحم ويخيط
هذا علاجها عندي

[خالد بن عبدالعزيز]

سلام
احب اشكر جميع من تفاعل معي وابدى لي رايه
وحبيت ابلغكم اني سويت كل اللي قلتوه ولا جد جديد بالبكرة
لكن اني رحت لبيطري شهير بالرياض وشرحت له الحاله وقال لي ان البكره اللي فيها نويخز وكل اللي سويته قبل لا يزيد ولا يفيد
وعطاني لها علاجات وتوني بادي بعلاجاته من يومين وعسى الله يتمم لها بالعافيه
ولا يركم في حلالكم ومالكم وعيالكم مكرووووه
وبالاخير اشكركم جزيل الشكر والله يجزاكم الف الف خير على تفاعلكم وحرصكم وحبكم للخير