صوت في تنفس الحوار

[فراج البقمي]

السلام عليكم ورحمة الله وبركاته:
عندي حوار له حوالي اسبوع ماهوب طبيعي اذا تنفس تسمع في تنفسه صوت( مثل الواحد اللي فيه ربو)واذا مشى وتعب طاح على طول
الحوار عمره حول ثلاث اسابيع اول ماجاء سليم ومافيه شي وبعدها باسبوع انصرع وكويناه عن الدوام وتحسن وطلع في تنفسه صوت
اتمنى ممن يعرف شي عن هالحاله يفيدني وجزاه الله خير

[عبدالله الجدعان العنزي]

يا فراج والله أنا أول مره اسمع بهالحاله . لكن سبحان الله , القادر على كل شي .

ليه ما عرضته على دكتور بيطري . خاصه وأن الحاله هذي جاته بعد الكوي

لأن الكي الخاص بالدوار , ما له خص بظهور صوت عند المشي . والله أعلم

[فراج البقمي]

يا اخوي عبدالله الحوار يقوم ويمشي ويرضع امه بس اذا جاء الظهر واحترت الشمس تثر عليه ونربطه في فيت الوايت واذا جاء العصر نفكه ويروح مع امه والصوت اللي في تنفس الحوار ما اقول انه من الكوي والحاله هذه موجوده في اثنين من حيران عيال عمي

[عبدالرحمن فوزي الحربي]

حتى عندنا يالربع كان زي كذا وكان ميقوم وعطيناه تورمسين لمدة يومين وطاب بس الصوت ماراح
ويش الحل

[فهد الأحمد]

الحوار علته في الرئه

يوجد علاج مفيد لأمراض الرئه
علبته صفرا ومرسوم عليها رئتين
يعطى منها الحوار مقدار 3 مل لمدة 4 أيام
بالإضافة لأعطائه 3 مل فيتامين

وإن شاء الله ما عليه شر

وسلامتك

[فراج البقمي]

للرفع والنفع

[عبدالرحمن فوزي الحربي]

اخوي فرج نفعة الطريقة اللي ذكرها الاخو
فهد الاحمد
راح الصوت اللي في الاحوار
انا ماجربتها بس بسالك جربتها ليعم النفع

[حمود المشعلي]

يا خوك هذا قد صار عندي وأمره بسيط البيطري يقول إلتهاب رئوي دقيته أبره مرتين ومن نفس اليوم وهو متحسن والكوي من الدوام ماله خص بالصوت الي تقول

[عبدالله الجدعان العنزي]

الحمد لله طالما أن له علاج عند البيطري فهذي نعمه كبيره . والحل يا خوي مالك ألا تشرح حالت الحوار للدكتور وتعطيه العلم بالتفصيل وعمر الحوار , وأن شاء الله يعطيك العلاج اللازم , ويتعافى الحوار , الله يبارك لك في حلالك .

[فراج البقمي]

يا اخوي عبدالرحمن الطريقه ما جربتها الحوار تحسن ولله الحمد
جزى الله خير من قام بالرد على الموضوع وغفرالله له ولوالديه

[حاصل اليامي]

هذا التهاب رئوي ويسبب حمى وعلاجه مضاد التهابات +خافض حراره وكلها موجوده عند البيطري لكن شف لك طبيب جيد واطلب منه وصفة الاخ فهد وان شاء الله يطيب حوارك.

[ذيب بن علي]

السلام عليكم ومساكم بالخير
هذا التهاب رئوي يروح مع الوقت حصل لحوارين عندنا وراح ولكن لو سمحت يا اخ فراج لو تعطينا كوي الدوام كويته بمطرق برقمه ومن وين كويته وين المحل لاهنت ..