الشمس

[خالد الحريص]

الى الأخوان مع التحيه ..
هل الولاده في هذه الأيام تظر بالحيران من حيث أشعة الشمس وهل تحتاج الى الظل ...؟

[عبدالمحسن المقاطي]

الحين لا ولكن الشهر الجاي اكيد

مابعد يجينى الحر الي يضر الحوار للحين

ولكن شهر ويدخل الحر


ولكن الي يلد الحين في الصيف يستحسن ينحط له مظله

[وافي مليح بن موطان]

ياخوي للحين ماجاء حر الحوار انت في العقرب الاخيره للحين وتوك ماحولك حر يضر الحوار

[علي عبدالله اليامي]

يارجال ظلل الحوار ولا عليك ان فيه صيف والاشتاء الضلال زين

[خالد الحريص]

المقاطي
مناحي
اليامي
الله لا يهينكم

[علي الدعجاني]

مرحبا

الايام ذي مايحتاج ظلال

وبالعكس الشمس زينه للحوار ذا الايام تقويه

لاكن انتبه من الرضاع الظهر
ودمت

[زاهر العرجاني]

الان المشكله ماهي في تعرضه للشمس لكن من شرب الحليب في وسط النهار

لان الحليب الحار راح يضره شي اكيد ويسبب له مشية البطن حاول انك تخفف عليه الحليب

وعطه ماء بارد في وسط النهار ولاعليه

[محمد بن صنهات]

شمل أمه ولاتبهلها ألا في براد الجو وماعليه خلاف

[سعود البريدي]

انا وانا منك باظلل عليه وباعطيه الظهر قرشه ام نص ريال ماي بارد من الما البيذر ويفضل انك تشمل امه من الساعه الحاديه عشر إلى الساعه الثالثه مساء
وسلامتك

[عبدالله الجدعان العنزي]

يا خالد الأخوان كلهم فيهم خير وبركه وكلن دلك على الصحيح جزاهم الله خير وبارك لهم وفيهم جميع . و ألوقت ذا ما بعد صار الحر فيه كايد ومضر على الحيران .
لكن من باب راحتك النفسيه والأطمئنان , الحوار شمل امه بالظهر لأن الحليب ثقيل عليه بالشمس ويتعب الحوار ويمشي بطنه ويسوي له إرباك معوي . وإذا جاء عصير فك الحوار على أمه بس لاتنسى بالظهر رش ماء حول مكانه واسقه ماء . والله يبارك لك .

[سويلم طريخم الرشيدي]

الحوار ابوه جمل ونا اخوك خله يتسدح با اشمس ما يضره اهم شي تنضف ديس امه من الحليب قليل من لحليب يكفيه الضل تكثر فيه الخمله الي تصقط علي القلب وتمص دم الحوا ر واذا انا قه مشبوكه اسبوعين لا تعطيها البرسيم حتي لا يكثر حليبها علي الحوار

[محمد بن عمير]

يارجال لو ينولد فالكنه خله لا تظلل ولا شئ

توكل على الله الظلال مهوب للبل للمعزاء هذي عطايا الله خل الشمس وامه احرص منك عليك بس اهم شئ لا يرضع واجد عشان ما يذرق

[عبدالله بن دخيل التميمي]

انا من واقع تجربتي لا تشمل الام ولا تشبك الحوار علشان مايصير عنده شراهه على الحليب خله مع امه 24 ساعه
ويفضل انك تنظف ديدها اوقات الحر الزايد
اهم شي ان الحوار مايجوع

[راشد حمدان]

الله يجزاكم خير علا المعلومات الطيبة