الفزعه خلفه تغص بالعلف ولا تاكل

[فهدبن سعود العتيبي]

مساكم الله بالخير

ياربع عندي ناقه خلفه توي شاريها سنها ام خمس تحتها بكره تو ماجالها شهر

الناقه حالها ضعيف مجيوبه من البر ودايم تضرس واذا اكلت العلف تغصبه وتقوم تسعبل وتزبد اكرمكم الله

لدرجة انها معاد تقدر تتنفس الا بصعوبه لين تلفض الي في فمها وها لحاله ماتجيها الا اذ اكلت

لدرجة اني احيانا احتريها تموت من قو غصتها غيرت العلف وحطيت شعير بس اكلت شيء مايذكر مع العلم ان الناقه مافيها نفوخ
وصحة بنتها زينه

فيه ناس قالو هيام وناس قالو دود واليوم ابي رايكم من عنده خبره ولا مرت عليه مثل هالحاله يفزع لي

[حاصل اليامي]

برك الناقه وعقلها وافتح فمها وشف شدوقها من الداخل تلقا فيها زوائد مثل الشوك ..ان كان طولها زايد بحيث انها يمكن تقرضها مع الاكل فهذي علتها والعلاج بسيط ...شف لك مقص حاد وقصصها واحذر على يدك لا تروح بين الطواحن وبعد التقصيص افركها بملح خشن وانتظر النتيجه...وان كانها طبيعيه فالناقه يمكن في حلقها شي دور لك طبيب شعبي جيد والا بيطري عنده خبره وخله يشوف ناقتك

[فيصل العنزي]

الله يشفيها
ولايخسرك

[مسلم البلوي]

مثل مقال اخوي حاصل اليامي
الله يشفيها

[احمد العطية]

مع أخوي حاصل بلاها في حلقها يمكن ناشب شي من الأكل بحلقها
شوفلك رجل خبير أو بيطري ممتاز والله يشفيها ولايخسرك

[فهدبن سعود العتيبي]

اخوي حاصل جزاكـ الله خير

جاري الكشف..........

[فهدبن سعود العتيبي]

فيصل
مسلم
احمد
الشكر موصول لكم على المشاركـ والتواصل وجزاكم الله كل خير

[وافي بن جابر آل نشيرا]

هذا حصل عند واحد من الربع في بعير والسبب انه ضاربه الراعي على لهاته(على رقبته) وداوم على الشوار(النخاله)طبعاُ مع الماء وايام قليله زال الالتهاب وطاب البعير.

[صالح المحمدي]

مثل ماقال حاصل
انا صارت عندي في ناقه شريتها ولا تاكل اكلها
ردي بالحيل ورحت للبيطري قال عطها حبوب دود
ولافادت وجبت لي رجال واول شي سواه فتح فم
الناقه ولقاه مليان من هالهدب
وقص الزوايد وحط لها ملح وابشرك الناقه كل يوم
احسن

[عبيد سعد السبيعي]

الله يشفيها ان شاء الله

[بندرنافع]

هذه احصلت في قعود لواحد من الربع وراح به عند الجامعه ودخلوا في فمه منظار وطلع فيه سدد عباره عن قطعه قماش ملتصقه في مجرى الاكل وعملو له عمليه بسيطه وهو بصحه ولله الحمد بعد العمليه

[فهد بن عبداللطيف بن شديًد]

ناقتك الله يشفيها مهدبة وعلاجها مثل ما قال الأخ حاصل اليامي

[حاتم العماري]

شريت لي ذود قبل رمضان الماضي واخبرني راعيه الاول انه مايعرف الشعير ابد
عانيت من هالمشكله فكل ما تعشت البل طلعت ثلاث او اربع غصص لين اقول بتموت
قلت بعدين تعود عليه وبعد 5 اشهر اضطريت احول على المكعب مما شفت في هالمساكين كل يوم ورغوها يتزابد
الان على المكعب كل شي على مايرام واكلها زين ولا فيها الا العافيه
حبيت انقل لك تجربتي والله يوفقك

[طلال بن عقاب]

هذا المرض يسمي (( الوخام ))
فك حلق الناقة مثل مقال اليامي وقطع الزايد وعلك بالملح الخشن وافركة وأنشالله يشفية الله سبحانة

[مشعل الكرين العتيبي]

يالربع ممكن شرح مفصل للمرض وعلاجه عشان نستفيد

[مبارك العازمي]

شريت لي ذود قبل رمضان الماضي واخبرني راعيه الاول انه مايعرف الشعير ابد
عانيت من هالمشكله فكل ما تعشت البل طلعت ثلاث او اربع غصص لين اقول بتموت
قلت بعدين تعود عليه وبعد 5 اشهر اضطريت احول على المكعب مما شفت في هالمساكين كل يوم ورغوها يتزابد
الان على المكعب كل شي على مايرام واكلها زين ولا فيها الا العافيه
حبيت انقل لك تجربتي والله يوفقك



مع اخوي حاتم الشعير لاتعطيها ناشف لازم تنقعه بالماي اقل شي 3 ساعات

[عبدالله الكدادي]

اخوي مثل مقال الاخ حاصل اليامي واللي يقصده الاخ حاصل يسمى ( حمام )

[محمد الوهبي التميمي]

اخوي نفس الحاله بضبط عندي ولااعرف وش اسوي على العموم على هالرابط موضوعي
http://www.mzayan.com/vb/showthread.php?t=25387

[مسعود العماري]

لا تعطي الناقة لا مكعب ولا شعير

جرب فقط البراسيم وشف الناقة وش تسوي هي بتاكل او تغص

وللعلم البل تختلف وبعض الاعلاف ما تناسبها الا بعد فترة

وانا كان عندي ناقة تاكل المكعب والشعير ولكن اذا حطيت الشعير المهروس

غصت به وانفردت من البل وقامت ترجع وتزبد ولا ناسبها ابد وبعده ماعاد جبت المهروس وانت الان جرب البرسيم او جرب الشوار (( النخال )) ورشه

بالماء وشف الناقة واللي يناسبها