وش علاج الناقة اللي تضلع من يدها

[فارس بن سعد]

السلام عليكم
عندي ناقة لقحة وباقي عليها يمكن سبوع وتنتج لكنها تضلع من يدها اليسرى من تقريبا 6 أشهر وفتشنا خفها وسليم ما عندها حفا يعني خفها بحمد الله سليم
وش علاجها ياجماعة الخير
الله يكتب لكم أجر المشاركة بالرأي السديد وسلامتكم.

[فارس بن سعد]

وين أهل الخبرة؟

[فهد الأحمد]

أرحب يا فارس

الضلاع وأنا أخوك له عدة أسباب ومن الصعب
أعطاء رأي دون الوقوف على الحالة

ولكن النصيحة تركها تلد
ولا تستعجل بالعلاج دام أمورها طيبه
وأكلها زين

لأن بعض الحالات يكون الضلاع بسبب أن الناقة سمين وعضمها جليل
ومع اللقاح تصير ثقيلة عليها القومه والبركة
ولكن إذا أنتجت بإذن بيخف بطنها ويزين حالها ويروح منها التعب.

وسلامتك

[نايف المزحمي]

هو صادق فهد .

مثل ماقال لك . انتظرها لين تلد . عند واحد من الربع ناقة وقبل ولادتها بشهر أو أكثر بدت تضلع من رجلها وبعد ماولدت صار ممشاها زين ولاعاد تضلع .

[فارس بن سعد]

مشكورين وما قصرتم وبيض الله وجوهكم

[وافي مليح بن موطان]

اخوي مثل ماقالو الاخوان اتركها لحد ماتلد وبعدين عالجها واسباب الضلع واجد مهوب شرط حفا يفيدونك الاخوان لكن لا تفارسها وهي ملافي