الناقه ديدها مورم [الأرشيف] - منتـديـات مــزايـن

علي عبدالهادي المري

18 / 12 / 2009, 47 : 04 PM

السلام عليكم ورحمة الله وبركاتة

مساكم الله بالخير .. يالربع أنا عندي ناقه ولدت وعقب ولادتها بثلاث أيام أورم ديدها وانتفخ .. والناقه قموص مانحلبها الا برباط .. المهم أن قد لها اسبوع وديدها مهوب زين منتفخ ويقطّر دم ولا فيه لبن .. واللي فيها مهوب تلجيع .. عطيتها ابرة وريم ولا به فايده .. وعطيتها المرهم اللي يدخل في الخلف بابرة بلاستيك ولا به فايده .. وادهنه يوميا ..

وألحين اللي عنده خلفيه عن علاجها ولا مرت عليه لا يبخل علينا .. والله يبيض وجيهكم ..

تحيتي

علي بن سالم ال زايد

18 / 12 / 2009, 06 : 05 PM

شوف وانا اخوك اذا خلف الناقة منكمش على داخل مع الانتفاخ فهذا ينخاف منه

واكوها على صعدة الخلف في نهايته من فوق من الخلف برقمة وان شالله تطيب ورشها بالماء البارد

واذا كان معه شوي سم يكون افضل

وهذا رقم دكتور جيد وان شالله بيفيدك

الدكتور اسمه عاطف

0508189540

بدر الذيابي

19 / 12 / 2009, 32 : 12 AM

عطها بنسلين بمقدار 20 مل ..لمدة ثلاثة ايام ...

ورشها بماء بارد اوثلج والثلج اطيب في الصباح والعصر ...

وادهن ديدها بدهون الوريم اللي لونه ازرق ....

واحرص على تنظيف ديدها من الحليب كل الاوقات ..

ولاقدامها الا العافيه

انشد مجرب .......

عبيد العتيبي

19 / 12 / 2009, 40 : 12 AM

مرحبا اخووي الديد جايه مرض والسبب ياخووي انه احدي الحالت الثانيه
الاول هو انها باركه علي مكان فيه بوول الله يكرم من يسمع
والثاني انه قرصه والعلاج ياخووك ترشه بما منقع بالملح
وبعده تفركه واذا فيه جرووح فقعه وصب الملح والماء عليه
وبعدين جب الجارة واخلطه مع الماء بسيط وانشالله تقوم بالسلامه

عبدالعزيز البقمي

19 / 12 / 2009, 51 : 12 AM

اخلط لك ماء بارد مع ملح ورشها كل صبح وعصر

وان شاء الله انها بتسلم ان كتب لها الله

مجرب

محمد ابو عدوة

19 / 12 / 2009, 00 : 08 AM

مرحبا يابو هادي اذا الناقة من ابلكم وخابر ديدها سليم هذا باب وله جواب والخلفة القموص يسخرها القيد في رجيلها ووريم الديد شائع وكثير في المصاغير واهتم في حلبها بعد كل عطيف والماء البارد كل صبح والمرهم اللي ريحه ريح فكس.و امنع البرسيم عنها عطها تبن في وجه العدو لمدة اسبوعين اوثلاثة حتى يقوى الحوار ويحفظ ديد الخلفة من الوريم .والابر اخر الحلول عطها بنسلين بمقدار 20 مل لمدة ثلاثة ايام .

وافي مليح بن موطان

19 / 12 / 2009, 03 : 03 PM

اذا بلى ناقتك خباش هذا سهل باذن الله امنع عنها البرسيم نهائيا والماء قدر المستطاع وعطها بنسلين 30 سانتي يوميا ومشها يوميا ممشى عجل لمدة 2 كيلو ولا حولها ورشها بماء بارد صبح ومساء باذن الله راح يختفي

واذا هو وريم ماهو خباش ويجي معه دم وزرد ولون اللبن مختلف فهذي صارت معي ياخوي في ناقه العام الماضي
ولا خليت عنها شي كل دكتور يشوفها يعطيني مضاد خاص ودهون والابرة الي تدخل في ساعد الديد وعشرين علاج
وكويتبها من قدم ديسها مباشرة بمطرقين على العرق ولاتغير شي وترى الوريم كان في القادم الايسر فقط
ويوم طابت النفس منها وعجزت فيها بعتها
وجاني بعد البيع من قال لي لو اخذت عينه من الحليب ورحت به لوزارة الزراعة يحللونه ويعطونك العلاج المناسب
وشوري عليك انك تحلل حليب ناقتك عندهم

علي عبدالهادي المري

19 / 12 / 2009, 50 : 09 PM

علي عبدالهادي المري

19 / 12 / 2009, 54 : 09 PM

بيض الله وجيهكم جميع .. والله لا يهينكم ..

والله عنده خلفيه لا يبخل علينا ..

ناشي راشد

20 / 12 / 2009, 35 : 02 AM

ابوعبدالهادي الديد المورم ندهنه بزيت محروق ونحط معه شوي سم وملح في ماعون صغير وبذن الله ماتصبح الاهي تقصع الجره مع اماتها بذن الواحد الاحد

علي عبدالهادي المري

24 / 12 / 2009, 28 : 04 AM

الله يعطيكم العافيه ويبيض وجيهكم ..

ناشي الله لا يهينك ابيك تشرح لي كيف زيت محروق؟؟

باسل المطيري

20 / 10 / 2010, 10 : 09 AM

http://www.mzayan.com/vb/mwaextraedit4/extra/93.gif

يا علي بن عبد الهادي اعلاج الناقه
عندي عطها ابرة هيام وابرة جرب
15 سانتتي 15سانتي تحت الجلد
واذا بغيت تستخدم كريم فرنسي لونه ابيض
مع ابرة الهيام والجرب يكون افضل
والنتيجة من اول يوم
http://www.mzayan.com/vb/mwaextraedit4/extra/36.gif

خالد الغزلي

20 / 10 / 2010, 54 : 09 AM

نفس الحاله حصلت معي ولاخليت علاج ماعطيتها الا الكي ماكويتها
وفي الاخير الناقه ضعف حالها ولاعاد تاكل واندلع ديسها وجا فيها مثل الخراريج وبعتها قصب على بلال
انا اقول ان الحل المبكر توديها للجامعه