العاذري

[سلطان المطيري]

الاخوه الكرام يشرفي ويسعدني ان اكون احد اعظاء هذا المنتدى الرائع
اعرض لكم العاذري
[فقط الأعضاء المسجلين والمفعلين يمكنهم رؤية الوصلات]

[مشعل اليامي]

ارحب يا سلطان

ويشرفنا انك تكون احد اعضاء هذا المنتدى

بالنسبه للبكره الموجوده صورتها اعلاه ما شاء الله والله يبارك لكم فيها

حيث ان خرتي في الوضح قليله جدا وامل من الاخوة الاعضاء اهل المغاتير مثل :-
عبدالله بن مطلق المزحمي ونقا هشال وعلي عبدالرحمن العتيبي

ولا قصور في الاخوة الباقين

تقبل خالص التحيه

مغليك

مشعل اليامي

[عبدالعزيزالشتوي التميمي]

اخي سلطان

مرحبا ومسهلا

انورت واسفرت

ويعطيك الف عافيه

بالنسبه للقعود ومن نظرتي المتواضعه

ماشاء الله تبارك الله

مبروووك وطيب بالحيل

الله يبارك فيه ويربحك ويوفقك

وننتظر اراء بقية الاخوه عبدالله بن مطلق المزحمي

وعلي عبدالرحمن العتيبي

فهم اصحاب الخبره والرأي السديد..

تقبل تحيتي

[ابراهيم البدراني]

سلطان المطيري ،،

حياك الله

ويا هلا ويا مرحبا

القعود ما شاء الله تبارك الله

الله يباركلكم فيه وفي انتاجه

وننتظر بقية الاخوان للتعليق على القعود

البدراني

[نايف الدوسري]

يا سلطان المطيري مرحبابك بين أخوانك
القعود لو انه مجهم أبشر بسعدك

[سلطان المطيري]

بارك الله فيكم جميعا حقيقة جعلتوني اتفائل جدا الله يسلمكم

[فيصل الجرباء الدوسرى]

اخوى سلطان
ما شاء الله القعود طيب واذا كان ابوة من فحول الامير عبدالعزيز فانشاء الله تشوف انتاجة اطيب
ولك اطيب التحيات

[فيصل بن مرخان]

الاخ سلطان القعود لا تفرطون فيه تراه طيب بلحيل مشاءالله عليه الراس و اللحي و الاذون والعرنون والعثنون كلها مسكته دقاق رقبه والسنام منفهق ماشاء الله كان سبحان الله موفقين واذا كنت بتبيع تراني شراي

تراك شاريه من سنتين لو انك شريته مفرود من ثلاث سنين الحين جذع ولاكن شكله لقي

[جاسم الجربوعي]

ارررحب ياسلطاااان ترحيبة المطر ومرحباااا مليووون


بالنسبه للقعود ماشاء الله تبارك الله والله يطرح فيه البركه


وان شاء الله يكون الاخ فيصل بن مرخان جوب على سؤالك واعطاااك نضرته


تحياااااتي

[سلطان المطيري]

يامرحبا ويمسهلا بكم جميعا وياهلا فيك يا بن مرخان في الحقيقه ان القعود غالي عندي جدا جدا وله معزه ما يعلمها الى الله سبحانه سبق ان سيم بــ 200 الف يوم كان حق ولم اقوى على بيعه ولاكن انا متكل على الله سبحانه وانشالله اني اكون من اصحاب الابل الممتازه

[ماجد العبدلي]

ارحب اخي سلطان تراحيب المطر

القعود ماشاء الله تبارك الله والله يطرح فيه البركه


تحياتي اخي سلطان

اخوك مــــاجــــد

[علي بن عبدالرحمن العتيبي]

الســلام عليكم ورحمة الله وبركاته

أخوي سلطان يامرحبا ومسهلا بك وبالربع
أنا بعطيك رأيي في القعود

القعود ياسلطان حلوو جدا صفحته زينه وعظمه زين والقعود منتل والراس كايف والظهر كايف والأذن زينه واللحي زين والغارب زين والرقبه حلوووه والشكل كله زين لكن باقي شئ مايندرى عنه هو الأنتاج والأنتاج يرجع للأصل حاول بقدره بأن تثبت أصل القعود عشان ترتاح وتوثق في القعود واللون ماعليه حلو وان شاء الله بيطرح الله فيه البركه

والقعود زي ماقلتلك زين لازم تهده على نوق وتشوف انتاجه

عسى الله يبارك لكم فيه ويرزقكم من انتاجه

تقبل تحياتي

أخوك علي العتيبي

[علي بن عبدالرحمن العتيبي]

أخوي بالله اذا ماعليك أمر عطنا صوره من الجنب كامل

لنا عوده

شكرا لك

[عبدالله بن مطلق المزحمي]

ألاخ سلطان المطيري

نسأل الله أن يبارك لنا ولك ولجميع المسلمين

اما اوصاف القعود غير واضحه بسبب الصوره ولا يقدر احد يعطيك الراي الصحيح

لابد من تصوير القعود صوره ثانيه وهو معترض حتي تشوف جميع مواصفاته

ونشكر جميع الاخوان اللي شاركو برايهم في القعود وجزاهم الله خير

احد الاخوان قال ان ظهر القعود طيب سبحان كيف عرف ظهر القعود وهو غير

باين في الصوره الرجاء من الاخوان الابتعاد عن المجاملات لانك تضر اخوانك

ولا تنفعهم

والقعود اخطيت انك ما شفت ابوه وامه لو انك سألت الرجال اللي باعك ورحت معه

لين شفت ابوه وامه كان افضل



تحياتي

عبدالله المزحمي

[سلطان المطيري]

شكرا شكرا على مداخلاتكم جميعا وانشالله اصور لكم القعود قريبا وانشالله يكون من اصل طيب وانتاجه طيب