يأخواني لا تخلوني من فزعتكم

[سيف القحطاني]

السلام عليكم ورحمة الله وبركاته

مساك الله بالخير وصبحكم الله بالرضا والسرور

يأخواني ابي خبرتكم و فزعتكم اذا ما عليكم امرر .... المووضوع :

عندي ست من النياق انتجت العام واذا انتجت يكون حوارها بخير مافيه الا العافيه يمر على ولادته من 10 الي 20 يوم بالكثير

عقبها يموت ......

حالته قبل يموت : تضعف حالته و تدخل عيونه وعقبها تقلب عيونه للوان الابيض و معاد يقدر على الوقوف ويصيبه اسهال ( اعزكم الله ).

وكل النياق الست مات حيرانها العام من هالمسببات ...

وقبل يومين مات عندي حوار عمره 12 يوم مثل هالمسببات ..

ما خليت علاج الا عطيته عطيناه ((( فيتامين سي لمدة 4 ايام مرتين في اليوم )) وعطيته (( علاج نسيت اسمه ثلاث ايام ))...
عقبها مات .........

وما ادري والله وشهي الطريقه لتفادي موت الحيران بعد الله ... والله اني تعبت وما خليت طريقه ولا علاج الا جربتها ....

والابل الحين على وشك الانتاج واخاف يصير مثل ما صار العام يموت حيرانها ....

وووهــــــــــــــل (((( علاج المعوي و الدموي )))) له دور في الموضوع لاني ما بعد عطيتها (( علاج المعوي و الدموي ))) .

هل اعطيها الناقه قبل الانتاج ولا الحوار .....

و الله لا يهينكم جميع ......

[ناصر نايف الكريزي]

الله يستر على حلالك
ويفرحك بالانتاج الطيب ويحفظه الله لك

[طلال الروقي]

أبشر ...

رااااجع هالمواضيع

موت الحوار فجأة (http://www.mzayan.com/vb/showthread.php?t=7183)

لزيادة مناعة المواليد الجدد (http://www.mzayan.com/vb/showthread.php?t=5961)

الحيران تموت فجأه (http://www.mzayan.com/vb/showthread.php?t=2954)

[راشد ال لزيز العجمي]

الله يفك عوق حلالك وحلال المسلمين اهم شي احرص عليها من البن الزايد وعليك بالتبن لناقه لنتجت وعطها شوي شعير واقطع الذره والبرسيم والمكعبات وتوكل علي الله

[ذيب بن علي]

ارحب يا سيف صارت لواحد من الربع كل سنه عنده ناقته يموت حوارها وخذا عينه من حليب الناقه ووداها لقسم التحليل بجامعة الملك فيصل واتضح ان حليب الناقه هو الي يذبح الحوار وعطاها علاج وتشالت خذ عينه من نفس الناقه ووده لاقرب قسم تحليل عندك وشوف النتايج وابلك شكلها في مزرعه ؟؟؟

[بدر بن فارس العتيبي]

أخي سيف الله والعالم أن الأرض اللي أنت فيها وخام ويمكن ما فيها حمض

والبل ينقصها بعض العناصر منها الأملاح

لذا التأثير يكون على الحيران

أنصحك بتغيير المكان ووضع الأملاح للبل من وقت لقاحها

وأنتبه للخمله من الحيران لو تمسحهن بعد أسبوع من الولاده بجره

هذا ما عندي والله أعلم

[سلطان الخنفري]

اخوي سيف البلا والله العالم انة من الحليب الزايد للحوار وانصحك اذا ولدت الناقة انك تشمل وخرها وأنشاء الله مايجي الحوار الا العافية

[نايف الحميداني]

الله يكفي اباعرك واباعر المسلمين شر هالامراض

اخوي انا تحصل عندي كل سنه بالحيران وهذا شي طبيعي بالبل لازم بالولاد يجيك كم حوار يذرق الله يكرمكم الين يمووت انا عندي لك علاج الي هو التروماسين الاصفر يبخ بفم الحوار خمس بخات كل يوم مرتين

والحمدلله جربته بكذا حوار وسلمن

اتمنى ان تكون اباعرك باتم الصحه والعافيه

[سيف القحطاني]

الله حي الجميع ارحبووو يا رجال وبيض الله وجيهكم

أخوي ناصر : بيض الله وجهك وجمل الله حالك يالذيب الله لايهينك على المرور العطر



أخوي طلال الروقي : بيض الله وجهك وجمل الله حالك ليتك والله حولي احب خشمك تستاهل لاهنت يالذيب



أخوي راشد : الله لايهينك ويبيض وجهك يالذيب وكل هالطرق الي قلتها اسويها مع الخلفات لاهنت يالذيب على مرورك العطر .


أخوي فارس : الله لايهينك وبيض الله وجهك وهذا انا اعطيها املاح معدنيه كل شهر مره وحده لان كثرت الاملاح تصعد الناقه .

أخوي سلطان : الله لايهينك هذا الي انا دايم احرص عليها من الحليب ولا اعتقد انه من الحليب . لاهنت ع النصيحه .

أخوي نايف : المقصد ماهو في ذراق الحوار المقصد ان الحوار يضعف حاله تدريجياً وهذا يبين لك انه فعلاً مرض في الحيران .


الله لا يهينكم جميع على المرور والنصائح الي ما نستغني عنها ولا عنكم ومنكم نسفيد بيض الله وجيهكم جميع

[عبدالعزيز العبدالله]

استخدم العلاج بعد الولادة 5 سم عضل لمدة 3 ايام

والعصار 12 سم بالفم مريتن قبل 24 ساعة من الولادة





http://www.alhadafa.com/uploadedfiles/images/2922.jpg