يا اهل النظر وش رايكم في الخلفه ( اشتري )؟ وبكم؟

[تركي القرفي]

سبحان الله وبحمده , سبحان الله العظيم

الاخوة الكرام

ابي رايكم مشكورين في الخلفه ام البكره وكم تستاهل

وتري بكرتها اللي تحتها ثالثها


هاه وش رايكم اشتري ولا لا ؟؟

اخيكم / تركي القرفي


http://www.geocities.com/nasssr_nassr/image_04.jpg

اخيكم / تركي القرفي

[علي بن عبدالرحمن العتيبي]

الراس ضافي والخشم وافي والرقبه ما عليها والظهر وسط

اشتر الله يبارك لك فيها

وعلمنا بالسوم او المشترى ووش سنها

وان شاء الله لي نظر فيها

[تركي القرفي]

سبحان الله وبحمده , سبحان الله العظيم

الاخ الكريم / علي

لاهنت على المشاركة وبيّض الله وجهك , وتراني اللي ابيكم تثمنونها يا ابو علي :):)


الاخوة الكرام اهل النظر ابيكم تشاركون لا هنتوا وتعطوننا رأيكم مثل ابوعلى .

اخيكم / تركي القرفي

[مشعل اليامي]

اخوي تركي

انا اعطي سوم 15 الف ريال
والراي لك وحسب الحليب

اخوك

مشعل اليامي

[زاهر العرجاني]

الاخ تركي القرفي

الناقه طيبه من خلال الصوره ولا اقدر احدد قيمتها

لانه فيه اشيا ماتبين في الصوره مثل الطول والديد سليم

ولالا هل هديه ولا لا اما من خلال الصوره

اعطيها من 15 الى 20الف والله يكتب اللي فيه الخير

[مسعود العماري]

حسب بكرتها بعد اذا هي زينة فالسعر اكثر واذا عادية فقيمة الناقة بالنسبة لي حد ما تتجاوز اثنين وعشرين الف

[سامي العلي]

الناقة وسط ، والصورة ماتبين

[عـبدالله الهاجري]

الناقة غاليه فيها ذا الوجه الضافي اما ظهرها تشره عليه شوي لكن الناقة ناقت بداوه باقي ديدها ونفسها اذا هي زينه مالها قيمة دون العشرين

ياليتك تدلنا على محل الناقة اذا مالك نية في مشتراها

[تركي القرفي]

سبحان الله وبحمده , سبحان الله العظيم

الاخوة الكرام

مشعل اليامي

زاهر العرجاني

مسعود العماري

سامي العلي

لاهنتوا على المشاركه وابداء أرائكم ( المعتبره ) والمهمه جداً لدي وبيّض الله وجيهكم , والناقة ابّشركم اني شريتها بـ 20 الف وعطِيت فيها الفين وهي في مكانها وعييت لا ابيع .

الاخ الكريم / عبدالله الهاجري

كما ذكرت للاخوة قبلك بأنني شريت الناقة قبل اقراء ردك الكريم ( الصائب ) واذا لك خاطر فيها يا عبدالله تراها تفدى حذيانك يا ابن العم .

اخيكم / تركي القرفي

[صالح بن جملا الديحاني]

الله يبارك لك فيها

ولاتنسي تعزمنا علي(((( طاسة حليب ))يحبها قلبك ياخوي تركي أن كان فيها حليب

[مشعل اليامي]

اخوي تركي

اذا كان لك شف في بيع الناقة حدد موقعك وانا اجيك

اخوك

مشعل اليامي

[تركي القرفي]

سبحان الله وبحمده , سبحان الله العظيم

الاخ الكريم / صالح الديحاني

انت زرنا في الشرقية وابشر بسعدك الحليب والشحم والعلم الغاني اللي ( تحرون به ) انت واخواني الكرام في هذا المنتدى من كًتاب وقراء.

الاخ الكريم / مشعل اليامي

حنا في الشرقية ( غرب مدينة ) الجبيل في ( جو سمين ) والشدة شمال قريب الله العالم ذا السبوع وبالنسبة للناقة وانا اخوك ما فيه شي محرم على البيع وتلفوني (( 0504827442 )).

اخوكم / تركي القرفي

[عـبدالله الهاجري]

ماقصرت ياتركي والي عندك كأنه عندي وانا اخوك وهذا يزودني ولا ينقصني الله يعطيك من خيرها ان شاء الله والناقة لاتفرط فيها دامك تبي البداوة تراها غاليه جداً

[صالح بن جملا الديحاني]

الله يسلمك يالغالي وماتقصر

وانت راعي الاوله

واذا كان لي زياره للشرقيه بأذن الله أجيك

[مسعود العماري]

تستاهل الله يربحك ويبارك لك

[جاسم الجربوعي]

الاخ تركي

الله يبارك لك فيها طيبه وماعليها كلام

موفق

[تركي القرفي]

سبحان الله وبحمده , سبحان الله العظيم

الاخوة الكرام /

عبدالله الهاجري

صالح بن جملا

مسعود العماري

جاسم الجربوعي

لاهنتوا وبيّض الله وجيهكم على مشاركتكم ونصائحكم ( القيّمه )

اخيكم / تركي القرفي