عندي ناقة غالية جداً لها سنتين حايل

[عـبدالله الهاجري]

اخواني الكرام

السلام عليكم ورحمة الله وبركاته

عندي ناقة غالية جداً لها سنتين حايل مع العلم انها قد استالدت قبل ذلك , والناقة ميسر والبعير اظربها اكثر من ثلاث مرات هذه السنة لكنها مابعد عشرت الى الان , الاسبوع الماضي قطعت منها وذم وملحت حياها لكن ما اعتقد ان هذا هو السبب لكن لعل وعسى

انا الان اسأل هل فيه احد يعرف يدخل على الناقة في الشرقية ويساوي الرحم وينظفه يمكن يكون الرحم ملتوي

فيه دكتور مصري في الجبيل يمدحونه احد جربه

[عبدالله العازمي]

اخى الهاجري الله يعينك على 200 ريال تقريبا تشيلها لمسشفى الاحساء والله شي فوق الخيال احد الاصدقاء شاريله ناقة على 15 الف حايل ماعمرها لقحت لعب فيها الولد طال عمرك النقه مسكتة كل مافيها حلو حلو حلو ناقة مزاين والله انه يقطعلها ويملحها ومش عارف تصدق انه مرة موديها لبعير يظربها يوم اظربها البعير اول ما قام البعير من الناقة وهو عليها بالمطرق طير عقلها وهو راد على الطريق لقى بعير وظربها مرة ثانية ولاكو فايدة المهم قاعدين بالديوانية والا مطلعين على قناة المشكاة عن مسشفى الاحساء والا مستشفى رائع وراح وعطاها فيتامينات وابرتين وبلاش ترى والحمدالله الان لقحة لها 3 شهور ومسيومة على 160 الف ولا باع

[خالد المطيري]

يمرحبا مليون أخوى عبدالله الهاجرى حياك الله بالمنتدى طال عمرك

وبنسبه على سؤالك طال عمرك كانك قطعت عن الناقه وملحته واصبر على الناقه وشف كانه مالقحت فى ابر يبعيونه تخلى الناقه تيسر ومجربه مظمونه وانت جربه وشف

موفق خير يالهاجرى

[عـبدالله الهاجري]

الاخ عبدالله العازمي الظاهر ان اخر المطاف اذا عجزنا عنها بنوديها للاحساء ويعينا الله

الاخ خالد المطيري ابشرك ان الناقه عشرت وهي الان معشر

[زاهر العرجاني]

الاخ عبدالله الهاجري

انشألله انه يتم لقاح ناقتك لك وشعلاجها لانه

عندي ناقه من اغلا الابل عندي ولاهي كبيره

بنتها الان لقيه وهذي اخر ماجابت ولاعاد لقحت جبت لها بيطري

مصري ونضفها وحط علاج بمالدها لكن انه مالقحت ورحت وجبت شايب وادخل

عليها ويقول انه لقا مالدها به ورم كبير ومادري عن لقاحها الناقه اذا اظربها البعير قعدت

مايقارب الشهر وهي لقحه وعقب تكسر والله مادريت وش اسوي بها لاني بايعها وارجو من الله انه تلقح

[منصور آل منصور اليامي]

الاخ عبد الله الهاجري
انا كان عندي نفس الطريقة وجاء سوداني صديق للراعي حقنا وكان الوالد يتحدث هو رجال علشان يشيلها يبيعها في السوق وقام السوداني بطلب اسبوعين من الوالد الله يحفظه وطلب مبرد حجر اللي يستخدم في العماير وقام الرجال وبرد لسان الناقة فوق او تحته والله نسيت وقام بعدها وساقها للبعير واضربها ولحقت الحمد لله والحين انتجت وعليها بكرة

[عـبدالله الهاجري]

الاخ زاهر اتمنى من الله ان يتم لقاحها وما تكسر انا الي سويته حصلت فيها صيد وقطعته وملحتها ولها اليوم 17 يوم وهي معشر البارحه تشول عند البعير

الاخ منصور اليامي هل من الممكن ان تدلني على السوداني او رقمه اذا كان في الشرقيه

ولكم مني الشكر الجزيل على المرور

[مسعود العماري]

بالنسبة لي اخ عبدالله فعندي ناقة نفس ناقتك حايل من سنتين وسويت جميع اللي ذكرو الاخوان من تنظيف وشيل الذيخ اللي تحت اللسان اللي يتكلم عنه منصور اليامي وابرة تثبيت ولا لقحت وفي اخر الموسم اراد الله لها لقاح واضربتها شهر اربعه السنه الماضية والبعير فادر بعد ولقحت ابشرك ولها الان عشرة اشهر والله يوفقك وتلقح ناقتك ان شاء الله وذلك لايمنع من فعل الاسباب مع الاعتماد على رب الاسباب سبحانه وتعالى

[شجاع عمر الأكلبي]

حياك الله يالهاجري


الله يتم لقاحها ولو أكسرت لا سمح الله فطبها عندي أبوصفه لك حيث أنني مجربه ومضمون بإذن الله أما أبر اليسره فلا تعطيها لها إلا إذا كانت ماتيسر لأنها خطيره على ضوامن الناقه


تحياتي لك

[ماجد العبدلي]

السلام عليك ورحمة الله وبركاته ....
اخواني الاعضاء والمشرفين

يعطيكم الله الف عافيه على هذا الموضوع واقول للأخ عبدالله الهاجري الله يتم لقاح ناقتك .

انا عندي ناقة العام والد بكر والسنة هذى لم تلقح حيث ان البعير ضربها ثلاث مرات وبعد ذلك اسوقها للبعير وما يضربها يشمها ويجنب عنها حسب ظنى ان ما فيها جسره وجبت ابرة الجسرة الهولنديه واليوم الثالث سقتها للبعير وهي تبرك تحته ذابحتها الجسرة ويشمها البعير ويجنب عنها وارده عليها ثم ضربها ولها اسبوع عساها تلقح .
وعندي ناقة غيرها جبت لها بيطري مصري من العيينة ودخل عليها ونضفها واسبوع يضربه البعير واليوم العاشر تشاول للبعير والحمد لله لها اسبوعين معشر .

[مشعل اليامي]

اشكر الجميع على هذه المعلومات المفيدة


تقبلوا تحياتي


مشعل اليامي

[نمرالشيباني]

صراحه معلومات مفيده تشكرون عليها

[عبدالعزيز العبدالله]

السلام عليكم اخواني الأعزاء انا عندي ناقة غالية جدا العام ولدت حوار و في السنة هذي شهر 10 ضربها البعير و لقحت لمدة شهر ونصف ثم كسرت قمنا بتقطيها وملحها ثم ضربها البعير وكسرت بعد 20يوم ثم ضربها البعبر ووجدنا صيد قطعناه و ملحناها ولم تلقح ثم ضربها البعير ولم تلقح , غسلت الرحم وعطيناها ابرة التهابات الرحم واربع تحاميل (أعزكم الله ) وبعد سبعة ايام ضربتها ابرة تيسيرو ثالث يوم ضربها البعير مالقحت...افيدوني ماالعلاج وهل تخبرون احد ممكن يساعدني في الموضوع دلوني عليه وياليت يكون في المنطقة الشرقية ( الدمام ) ولكم مني جزيل الشكر .

[حمود العطوي]

السلام عليكم اخواني الأعزاء انا عندي ناقة غالية جدا العام ولدت حوار و في السنة هذي شهر 10 ضربها البعير و لقحت لمدة شهر ونصف ثم كسرت قمنا بتقطيها وملحها ثم ضربها البعير وكسرت بعد 20يوم ثم ضربها البعبر ووجدنا صيد قطعناه و ملحناها ولم تلقح ثم ضربها البعير ولم تلقح , غسلت الرحم وعطيناها ابرة التهابات الرحم واربع تحاميل (أعزكم الله ) وبعد سبعة ايام ضربتها ابرة تيسيرو ثالث يوم ضربها البعير مالقحت...افيدوني ماالعلاج وهل تخبرون احد ممكن يساعدني في الموضوع دلوني عليه وياليت يكون في المنطقة الشرقية ( الدمام ) ولكم مني جزيل الشكر .


ان شاء الله يفيدونا الاخوان لان عندى نفس المشكله

[عبدالله حمد هران]

الله يتم لقاح الناقه يالهاجري
وبالتوفيق

[علي بن علي]

السلام عليكم ورحمه الله وبركاته

فيه ناقه عند واحد من الربع ما تلقح . دخلوها للبعير واظربها ولا لقحت وتمت الناقه تقريبا 7 سنوات . كل الطرق سوولها ولا فيه نتيجه وآخر المطاف ودوها المستشفى وقال الناقه فيها ورم داخلي وماله علاج .


المهم عرضوا الناقه للبيع واشتريتها من عندهم وضيرناها ونوخناها وقطعنا عنها ويبت لها آبار وحبوب ولا فيه نتيجه ونوختها لبعير عماني ولا فيه فايده .

آخر ما سويت عزلتها مع ناقه ثانيه ما تلقح مده 14 يوم بدون ماء ولا علف بعدها دخلتها على فحل ولقحت هي والناقه الثانيه وولدن بكره وقعود .



والسلام عليكم ورحمه الله وبركاته

[علي بن علي]

السلام عليكم اخواني الأعزاء انا عندي ناقة غالية جدا العام ولدت حوار و في السنة هذي شهر 10 ضربها البعير و لقحت لمدة شهر ونصف ثم كسرت قمنا بتقطيها وملحها ثم ضربها البعير وكسرت بعد 20يوم ثم ضربها البعبر ووجدنا صيد قطعناه و ملحناها ولم تلقح ثم ضربها البعير ولم تلقح , غسلت الرحم وعطيناها ابرة التهابات الرحم واربع تحاميل (أعزكم الله ) وبعد سبعة ايام ضربتها ابرة تيسيرو ثالث يوم ضربها البعير مالقحت...افيدوني ماالعلاج وهل تخبرون احد ممكن يساعدني في الموضوع دلوني عليه وياليت يكون في المنطقة الشرقية ( الدمام ) ولكم مني جزيل الشكر .



بخصوص الناقه تلقح وتكسر بعضهم يوسمها تحت سبتها مطرق . ويلل الناقه ويجنبها الماء البارد

[نادر الشنيفي]

إقتباس: اقتباس من مشاركة عبدالعزيز العبدالله


السلام عليكم اخواني الأعزاء انا عندي ناقة غالية جدا العام ولدت حوار و في السنة هذي شهر 10 ضربها البعير و لقحت لمدة شهر ونصف ثم كسرت قمنا بتقطيها وملحها ثم ضربها البعير وكسرت بعد 20يوم ثم ضربها البعبر ووجدنا صيد قطعناه و ملحناها ولم تلقح ثم ضربها البعير ولم تلقح , غسلت الرحم وعطيناها ابرة التهابات الرحم واربع تحاميل (أعزكم الله ) وبعد سبعة ايام ضربتها ابرة تيسيرو ثالث يوم ضربها البعير مالقحت...افيدوني ماالعلاج وهل تخبرون احد ممكن يساعدني في الموضوع دلوني عليه وياليت يكون في المنطقة الشرقية ( الدمام ) ولكم مني جزيل الشكر .



الاخ عبدالعزيز

انا لي تجربه باذكرها لك وللاخوان

عندي ناقه ولدة اول ولده لها وبعدها لم تلقح لمدة ثلاث سنوات ولا خليت دكتور ولا طب شعبي ماجبته لها

ولم تلقح مع العلم كل اللي ذكروه الاخوان قبلي في مشاركاتهم سبق وسويته لها ماعدا مستشفى الحساء ماوديتها له .



المهم كان عندي خلفيه عن اللي يقولون اطردها بالسياره واظربها وانشالله تلقح . ولا كنت مقتنع بها .


ولكن بعد فشل كل محاولاتي قلت لنفسي ابسوي هالطريقه واشوف....

خليتها لين يسرة وقمت وطردتها على السياره مسافة من 3كيلو الا 4 كيلو ثم فكيت البعير عليها واظربها في اخر الموسم العام

والحمدلله لقحت بفضل الله ...............

هذا عن تجربتي الخاصه والله اعلم ...................


وتقبل تحيااااااااااااااااااااااتي

[عبدالعزيز العبدالله]

الأخ العزيز نادر

السلام عليكم ورحمة الله وبركاته

اشكر لك على المشاركة المفيدة .

بالتوفيق لك

ودمت بود

[نصار ابراهيم المقيطيب]

السلام عليكم ورحمة الله وبركاته..


مشكوراخوي علي المعلومات ويعطيك الــــــــــــــ الف ــــــــف عافيه:):thanks::D

[سويلم طريخم الرشيدي]

عـبدالله الهاجري يوجد في الصيدليه البيطريه غسيل لرحم الصيدلي يركبه يعني يضيف عليه ما عا دي يعطيك معه برواز ويعطيك انوبه طويله لا تخذها خذ البروا ز فقط ضخ الكميه في رحم انا قه بعدها بيومين نوخها للجمل انا مجربه قبل شهر والحمد لله توفقت واتوفيق من الله سبحا نه

</B></I>